બોલિવૂડ અભિનેતા અક્ષય કુમારે તેમના સ્વર્ગસ્થ માતાપિતા હરિઓમ ભાટિયા અને અરુણા ભાટિયાની યાદમાં મુંબઈમાં વૃક્ષારોપણ અભિયાનનું નેતૃત્વ કર્યું અને તેમને શ્રદ્ધાંજલિ આપી. અક્ષય કુમારે એક નિવેદનમાં જણાવ્યું હતું કે, ‘વૃક્ષો વાવવા એ પૃથ્વી માતા પાસેથી અમને જે મળ્યું છે તેના માટે અમારી તરફથી એક નાનકડી વળતરની ભેટ સમાન છે. મારા માતા–પિતાના સન્માનમાં આ કરવું મારા માટે વધુ ખાસ બનાવે છે.અભિનેતાએ ભારપૂર્વક જણાવ્યું હતું કે વૃક્ષારોપણ અભિયાન તેમના પ્રેમ અને સંભાળને શ્રદ્ધાંજલિ છે. “તે તેમના પ્રેમ અને સંભાળને શ્રદ્ધાંજલિ છે અને ભવિષ્યની પેઢીઓ માટે પર્યાવરણનું જતન અને જાળવણી કરવાનું વચન છે,” તેમણે કહ્યું.
અક્ષયે ખેરવાડીમાં વેસ્ટર્ન એક્સપ્રેસ વે પર વૃક્ષારોપણ અભિયાનનું નેતૃત્વ કર્યું હતું. અભિનેતાએ બૃહન્મુંબઈ મ્યુનિસિપલ કોર્પોરેશન (BMC) કમિશનર ભૂષણ ગગરાણી સાથે મળીને 200 બહાવાના વૃક્ષો વાવ્યા. એક નિવેદન અનુસાર, BMC, બૃહન્મુંબઈ મ્યુનિસિપલ ટ્રી ઓથોરિટી અને મેક અર્થ ગ્રીન અગેઈન (MEGA) ફાઉન્ડેશનના સહયોગથી શરૂ કરાયેલી આ પહેલ, ચક્રવાત તૌક્તાઈથી પ્રભાવિત મુંબઈના અમૂલ્ય લીલા કવરને પુનઃસ્થાપિત કરવાની દિશામાં એક મહત્વપૂર્ણ પગલું છે.
વૃક્ષારોપણ અભિયાનને અનિલ કપૂર, શત્રુઘ્ન સિન્હા, અભિષેક બચ્ચન, અનુપમ ખેર, બપ્પી લાહિરી, અજય દેવગન, સોનુ નિગમ, સંગ્રામ સિંહ, રણવીર શૌરી, રોહિત શેટ્ટી, હેમા માલિની, સોનાક્ષી સિંહા અને આયેશા ઝુલ્કા જેવા મોટા કલાકારોનો ટેકો મળ્યો છે. અક્ષય ટૂંક સમયમાં ‘સરફિરા‘માં જોવા મળશે. આ ફિલ્મમાં તે વીર મ્હાત્રેનું પાત્ર ભજવી રહ્યો છે, જેનો ઉદ્દેશ્ય ઓછી આવક ધરાવતા લોકો માટે સસ્તું એરલાઇન બનાવવાનો છે. આ ફિલ્મમાં સિમ્પલીફ્લાય ડેક્કન એરલાઇનના સ્થાપક કેપ્ટન જી.આર. ગોપીનાથના જીવનથી પ્રેરિત.
ફિલ્મમાં અક્ષય ઉપરાંત પરેશ રાવલ, રાધિકા મદન અને સીમા બિસ્વાસ મહત્વની ભૂમિકામાં છે. કેપ ઑફ ગુડ ફિલ્મ્સની અરુણા ભાટિયા, સુર્યા અને જ્યોતિકા (2ડી એન્ટરટેઈનમેન્ટ) અને વિક્રમ મલ્હોત્રા (અબન્ડેન્ટિયા એન્ટરટેઈનમેન્ટ) દ્વારા નિર્મિત, ‘સરાફિરા‘ 12 જુલાઈએ સ્ક્રીન પર આવવાની છે.
